Այսօր՝ փետրվարի 18-ին, ժամը 15:30-ի սահմաններում, ՀՀ Արտակարգ իրավիճակների նախարարության փրկարար ծառայության ճգնաժամային կառավարման կենտրոն ահազանգ է ստացվել, որ Արարատի մարզի Խաչփար գյուղի վարչական շրջանում գտնվող Հրազդան գետում, ըստ տեղեկությունների, 13-ամյա երեխա է խեղդվել: 

Ինչպես նշված վայրից հայտնում է ֆոտոլրագրող Գագիկ Շամշյանը, այս պահին ժամանել են ՀՀ ԱԻՆ փրկարար ծառայության օպերատիվ կառավարման կենտրոնի օպերատիվ խումբը և հատուկ փրկարար 3-րդ ջոկատի աշխատակիցները: 

Խմբի ղեկավար Արթուր Ճաղարյանի կանչով` դեպքի վայր են հրավիրվել նաև հատուկ ջրասուզակներ, քանի որ 2 ժամից ավելի տևող որոնողական աշխատանքներն արդյունք չեն տալիս: Առաջին պահից տեղում է համայնքի ղեկավար Շահեն Մարտիրոսյանը և գյուղի ժողովուրդը, ովքեր նույնպես ներգրավված են երեխայի որոնողական աշխատանքներում: 

Տեղում է նաև Ոստիկանության Մասիսի բաժնի օպերատիվ քննչական խումբը: Համայնքի ղեկավարը ֆոտոլրագրողին հայտնել է, որ երեխան, որին փնտրում են, նույն գյուղի միջնակարգ դպրոցի 8-րդ դասարանի աշակերտ Արսեն Բալայանն է: Երեխայի ընտանիքը նախկին փախստականներ են, և գտնվում են սոցիալապես անապահով վիճակում: Երեխան իր 3-4 ընկերների հետ է եղել, ովքեր եկել էին Հրազդան գետի մոտ, ինչից հետո, ըստ երեխաների պատմածի, տեղի է ունեցել ողբերգությունը: Քիչ առաջ նշված վայր ժամանեց նաև Արարատի մարզպետ Էդիկ Բարսեղյանը:

Քիչ առաջ ֆոտոլրագրողը հայտնեց, որ ՀՀ ԱԻՆ փրկարար ծառայության օպերատիվ վարչության պետ Արման Ցոլակյանի՝ դեպքի վայր ժամանելուց հետո նրա հանձնարարականով հրավիրվում են Սևանի ջրասուզակները, քանի որ մինչ այս պահը որոնողական աշխատանքներն արդյունք չեն տալիս: Տարածք են բերվել նաև հատուկ տեխնիկաներ, լուսարձակ, որպեսզի լուսավորվի ամբողջ տարածքը, և փրկարարները կարողանան հանգիստ աշխատել: Մինչ այս պահը տեղում են նաև Մասիսի ոստիկանապետն ու Խաչփարի գյուղապետը: 

Քիչ առաջ` ժամը 22:05-ին, դեպքի վայր ժամանեց ՀՀ Արտակարգ իրավիճակների նախարար Արմեն Երիցյանը: Երեխայի որոնողական աշխատանքները շարունակվում են:

Լուսանկարները՝ Գագիկ Շամշյանի