11:31 Աշոտ Աստաբացյան. Կարմիր Խաչը Հայաստանի կառավարությանը անհետ կորածների վերաբերյալ տվյալներ կուղարկի | |
Կարմիր Խաչի միջազգային կոմիտեն (ԿԽՄԿ) Հայաստանի կառավարությանը ղարաբաղյան հակամարտության հետեւանքով անհետ կորածների վերաբերյալ տվյալներ կուղարկի։ NEWS.am-ի թղթակցի հետ զրույցում այս մասին հայտարարեց ԿԽՄԿ-ի Հայաստանի պատվիրակության հաղորդակցման ծրագրերի պատասխանատու Աշոտ Աստաբացյանը: «Գործընթացն արդեն իսկ մեկնարկել է։ Անհետ կորածների մասին տեղեկությունները էլեկտրոնային տեսքով կներկայացվեն Հայաստանի կառավարությանն առընթեր Գերիների, պատանդների եւ անհետ կորածների հանձնաժողով։ Տվյալների բազան ստեղծվել է անցած մեկ տարվա ընթացքում»,- նշեց նա։ Աստաբացյանը նաեւ տեղեկացրեց, որ տվյալների հիման վրա հայկական կողմը առաջիկա տարիների ընթացքում արտաշիրիմում կիրականացնի՝ փորձելով որոնել Կարմիր Խաչի միջազգային կոմիտեի ներկայացրած ցուցակներում առկա մարդկանց: Հարցին, թե նման գործընթաց իրականացվելու է նաեւ Ադրբեջանո՞ւմ, ԿԽՄԿ-ի Հայաստանի պատվիրակության հաղորդակցման ծրագրերի պատասխանատուն նշեց, որ հաստատ ոչինչ ասել չի կարող։ «Հնարավոր է՝ այնտեղ էլ այդպիսի գործընթաց իրականացվի, սակայն չեմ կարող ասել՝ իրականացվում է, թե ոչ կամ ինչ փուլում է արտաշիրիմումի գործընթացը գտնվում»,- ասաց Աստաբացյանը։ Նշենք, որ Կարմիր Խաչի միջազգային կոմիտեի տվյալներով` Հայաստանից անհետ կորածների թիվը հասնում է 407-ի, Լեռնային Ղարաբաղից՝ 449-ի, Ադրբեջանից՝ 3710-ի: | |
|
Մեկնաբանություններն ընդամենը՝: 0 | |